დავით პეტრიაშვილის სახელობის 2020 წლის ზამთრის თასზე ლეგენდათა ტურნირი დაიწყო. განახლებული ფორმატით მიმდინარე გათამაშებაში მონაწილეობას 6 გუნდი იღებს: საქართველოს, უკრაინის, ესპანეთის, თურქეთის, უეფასა და ფიფას ვეტერანი ფეხბურთელები.
ჯგუფური ეტაპი 13:30 საათიდან დაიწყო და ქართველი გულშემატკივრისთვის სასიხარულოდ დასრულდა.
B ჯგუფში საქართველომ ორივე შეხვედრის დამაჯერებლად მოგება მოახერხა და პირველი ადგილით ნახევარფინალის საგზური გაინაღდა. ქართველმა ვეტერანებმა ჯერ უეფას (5:2), შემდეგ კი ფიფას (5:3) მოუგეს და 6 ქულა დააგროვეს. მასპინძელთაგან გოლების გატანა იაშვილმა (4), სირაძემ (2), დემეტრაძემ, ამისულაშვილმა (2) და რევაზიშვილმა მოახერხეს.
საქართველოსთან ერთად, B ჯგუფიდან უეფას გუნდი გავიდა, რომელმაც ფიფა დაამარცხა.
რაც შეეხება A ჯგუფს, აქედან ნახევარფინალში 4-4 ქულით უკრაინისა და თურქეთის ნაკრები გუნდები გავიდნენ.
ჯგუფური ეტაპის შედეგები
A
თურქეთი 1:0 ესპანეთი
თურქეთი 0:0 უკრაინა
ესპანეთი 1:4 უკრაინა
B
უეფა 2:5 საქართველო
უეფა 6:4 ფიფა
საქართველო 5:3 ფიფა
ამრიგად, ნახევარფინალში, რომელიც 17:00 საათიდან დაიწყება, ერთმანეთს საქართველო და თურქეთი და უეფა და უკრაინა დაუპირისპირდებიან.
