ხვალ, 26 იანვარს, 2023 წლის პირველი შეჯიბრი – პორტუგალიის გრან პრი აიღებს სტარტს, სადაც საქართველოს ნაკრები 12 სპორტსმენით არის წარმოდგენილი.
26 იანვარს, პირველ საშეჯიბრო დღეს, საქართველოს ნაკრების სახელით 3 სპორტსმენი იჭიდავებს, საიდანაც ერთი – იპოლიტე აქუბარდია დებიუტანტია.
-60 კგ
-60 კგ წონით კატეგორიაში საქართველოს ნაკრების ღირსებას გიორგი სარდალაშვილი დაიცავს.
19 წლის ქართველი D ბადეში განთესილი იქნება, შესაბამისად ასპარეზობაში მეორე წრიდან ჩაერთვება, სადაც, მონღოლ – სუხბატ ბიამბასურენსა და ნიდერლანდელ – ემიელ იარგინს შორის გამარჯვებულს შეხვდება.
სარდალაშვილს ბადეში 2022 წლის თელ ავივის გრანდ სლემის გამარჯვებული, წარმოშობით უკრაინელი – არტიომ ლესიუკი ჰყავს.
– 66 კგ
-66 კგ წონით კატეგორიაში 2 ქართველი ისპარეზებს: გიორგი თუთაშვილი და 2022 წლის საქართველოს ჩემპიონი – იპოლიტე აქუბარდია.
აქუბარდია განთესილია და B ბადეში მიიღებს მონაწილეობას, სადაც უზბეკ – ბობურ ვადიევსა და უკრაინელ – კარო მარანდიანს შორის გამარჯვებულს შეხვდება.
რაც შეეხება გიორგი თუთაშვილს, გიორგი განუთესავია და D ბადეში იასპარეზებს. გიორგი პირველივე ეტაპიდან იწყებს და მას ეკვადორელი მეტოქე – ლენინ პრეციადო ჰყავს. გამარჯვების შემთხვევაში კი მეორე ეტაპზე ქართველის მეტოქე, უზბეკი – მუხრიდინ ტილოვი იქნება.
წინასწარი შეხვედრები თბილისის დროით 13:00, ფინალური ბლოკი კი 21:00 საათიდან დაიწყება.
