23-25 ივნისს, მონღოლეთის დედაქალაქი ულან-ბატორი, ძიუდოს საერთაშორისო შეჯიბრს – ულან-ბატორის გრანდ სლემს უმასპინძლებს, სადაც ამ მომენტისთვის 5 კონტინენტის, 45 ქვეყნის 349 სპორტსმენია რეგისტრირებული.
საქართველოს ნაკრები კი ულან-ბატორის გრანდ სლემზე 3 სპორტსმენით იასპარეზებს: ონისე სანებლიძე, ვარლამ ლიპარტელიანი (100 კგ) და საბა ინანეიშვილი (+100 კგ).
100 კგ
100 კგ წონით კატეგორიაში ვარლამ ლიპარტელიანი და ონისე სანებლიძე იასპარეზებენ.
ვარლამ ლიპარტელიანი B ბადეში განთესილია და ასპარეზობას მეორე ეტაპიდან დაიწყებს, სადაც მისი მეტოქე, ყაზახ – ბეკზატ შაგატიევსა და გერმანელ – კილიან კაპპელმეიერს შორის გამარჯვებული იქნება. 1/4-ფინალში გასვლის შემთხვევაში კი დიდი ალბათობით, ვარლამის მეტოქე, უძლიერესი პორტუგალიელი – ჟორჟ ფონსეკა იქნება.
რაც შეეხება ონისე სანებლიძეს, სანებლიძე D ბადეში განუთესავი იქნება და ასპარეზობაში პირველი ეტაპიდან ჩაერთვება, სადაც ყაზახ – ნურლიხან შარხანს დაუპირისპირდება. ყაზახური ბარიერის დაძლევის შემთხვევაში კი სანებლიძე, მონღოლ – ხანდიგარიდ განტულაგსა და გერმანიის სახელით მოასპარეზე – გიორგი უძილაურს შორის გამარჯვებულს დაუპირისპირდება.
აღსანიშნავია ის ფაქტი, რომ ონისე სანებლიძეს ბადეში უძლიერესი – არმან ადამიანი ჰყავს.
+100 კგ
მძიმე წონაში საქართველოს ნაკრების ღირსებას – საბა ინანეიშვილი იცავს, რომელიც განუთესავია და პირველივე ეტაპიდან ჩაერთვება ასპარეზობაში.
ინანეიშვილის მეტოქე გერმანელი – ერიკ აბრამოვი იქნება, გერმანული ბარიერის დაძლევის შემთხვევაში კი საბა იაპონელ – ჰიოგა ოტას დაუპირისპირდება.
შეგახსენებთ, რომ სამივე ქართველი ტატამზე 25 ივნისს იასპარეზებს.
