ნიკოლოზ ბასილაშვილი მადრიდის მასტერსს პირველივე წრეში გამოეთიშა. ქართველმა ჩოგბურთელმა ფრანგ ბენუა პერთან (35) წააგო.
გასულ კვირას, მიუნხენში მოპოვებული ტიტულის შემდეგ, ნიკოლოზმა ესპანეთში წარმატებულად ვეღარ იასპარეზა. 31 წლის პერთან ქართველი 2 სეტში – 4:6; 5:7 დამარცხდა. დაპირისპირება 1 საათსა და 14 წუთს გაგრძელდა, რა დროშიც ბასილაშვილმა საკუთარი ჩაწოდება 5-ჯერ დათმო. საპასუხოდ, ქართველმა ჩოგბურთელმა ბრეიკის შესრულება 3-ჯერ მოახერხა.
უნდა აღინიშნოს, რომ გამოცდილმა ფრანგმა დღევანდელ თამაშში კარგად ჩააწოდა. მას 14 ეისი ჰქონდა, თუმცა 9 ორმაგი შეცდომაც დაუშვა.
ბენუა პერს ბასილაშვილთან თამაშამდე ზედიზედ 7 წაგება ჰქონდა. ზოგადად, 2021 წელს მის ანგარიშზე 10 მარცხი და მხოლოდ 1 მოგება იყო. შემდეგ წრეში პერი სტეფანოს ციციპასს შეხვდება.
