დღეს, 21 ივნისს, მინსკში (ბელარუსში) ევროპული თამაშები დაიწყო. საქართველოს ძიუდოისტთა ნაკრები ასპარეზობაში ხვალ, 22 ივნისს ჩაერთვება. დღეს კი ტურნირის წილისყრა გაიმართა და ქართველი ძიუდოისტების მეტოქეები გაირკვა.

ხვალ, პირველ საშეჯიბრო დღეს, ქართველი ძიუდოისტები -60 და -66 კგ წონით კატაგორიებში იასპარეზებენ, ხოლო ქალებში -57 კილოგრამ წონით კატეგორიაში იასპარეზებს ეთერ ლიპარტელიანი.

-60 კგ

საქართველოს სახელით -60 კილოგრამ წონით კატეგორიაში ამირან პაპინაშვილი და ლუხუმ ჩხვიმიანი იასპარეზებენ. ამირან პაპინაშვილი ასპარეზობაში მეორე ეტაპიდან ჩაერთვება და მისი მეტოქე ესპანელ – ხოაკინ გომესსა და ებრაელ – ბენ დავიდს შორის გამარჯვებული იქნება.

რაც შეეხება ლუხუმ ჩხვიმიანს, ლუხუმიც პაპინაშვილის მსგავსად ასპარეზობაში მეორე წრიდან ჩაერთვება და მისი მეტოქე თურქ – მიჰრაჩ აკუსსა და ბულგარელი ვალენტინ ალიპიევს შორის გამარჯვებული იქნება.

-66 კგ

საქართველოს სახელით -66 კილოგრამ წონით კატეგორიაში ამ წონის პირველი ნომერი – ვაჟა მარგველაშვილი და ბაგრატ ნინიაშვილი იასპარეზებენ. ვაჟა მარგველაშვილი ასპარეზობაში მეორე ეტაპიდან ჩაერთვება და მისი მეტოქე სერბი – სტარია ბენჩინი იქნება, ხოლო რაც შეეხება ბაგრატ ნინიაშვილს ფრანგი – კილიან ლე ბლუ შეხვდება.

-57 კგ (ქალები)

საქართველოს სახელით -57 კილოგრამ წონით კატეგორიაში ეთერ ლიპარტელიანი იასპარეზებს. ლიპარტელიანი პირველივე ეტაპიდან იჭიდავებს და მისი მეტოქე აზერბაიჯანელი იჩინხორლოო მუნხცედევი იქნება.

ევროპული თამაშები: ქართველი ძიუდოისტები საქმეში ერთვებიან