ევროპული ფეხბურთის ლეგენდა – ხაბი ალონსო, ბუნდესლიგის კლუბის მთავარი მწვრთნელის პოსტს დაიკავებს. აღნიშნულ ინფორმაციას, გავლენიანი გერმანული გამოცემა Bild-ი ავრცელებს. წყაროს მტკიცებით, მიმდინარე სეზონის დასრულების შემდეგ, ხაბი ალონსო “გლადბახის” მთავარი მწვრთნელის პოსტზე მარკო როზეს ჩაანაცვლებს.
Xabi Alonso will be the next Borussia Mönchengladbach head coach, according to Bild. His Real Sociedad contract expires this summer. #BMG
— Ronan Murphy (@swearimnotpaul) March 22, 2021
მომდევნო სეზონში, როზე დორტმუნდის “ბორუსიას” უხელმძღვანელებს. ამ წუთისათვის ხაბი ალონსო “რეალ სოსიედადის” სათადარიგო გუნდს წვრთნის – ესპანელის კონტრაქტი მიმდინარე წლის ზაფხულში იწურება. “ლივერპულისა” და “რეალის” ყოფილ ვარსკვლავსა და “გლადბახის” მესვეურებს შორის შეთანხმება მიღწეულია, თუმცა კონტრაქტის სრული დეტალები ჯერ-ჯერობით უცნობია.
ბრწყინვალე საფეხბურთო კარიერის განმავლობაში, ალონსო ისეთ გენიალურ მწვრთნელებთან თანამშრომლობდა, როგორიცაა: რაფა ბენიტესი, კარლო ანჩელოტი და პეპ გვარდიოლა. ხაბი ალონსომ “ბაიერნის” მაისურით გერმანიაში 3 სეზონი იასპარეზა – შესაბამისად ბუნდესლიგა მისთვის უცხო არაა.