რუსეთის ჩემპიონატის სადისციპლინო კომიტეტმა სოლომონ კვირკველიას დისკვალიფიკაცია გაუუქმა. კომიტეტის ხელმძღვანელმა არტურ გრიგორიანტსმა საკამათო გადაწყვეტილებების შესახებ გამოაცხადა, რომლის მიხედვითაც მოსკოვის “ლოკომოტივის” ქართველ ცენტრალურ მცველს და “ცსკა-ს” უკანახაზელ ვადიმ კარპოვს ბოლო მატჩებში მიღებული წითელი ბარათები გაუუქმდათ.
“ორივე კლუბმა გადაწყვეტილება გაასაჩივრა, რის მერეც ექსპერტთა კოლეგიამ ეპიზოდები ხელახლა გაანალიზა და წითელი ბარათების გაუქმების გადაწყვეტილება მიიღო”,-ამბობს გრიგორიანტსი.
რუსეთის პრემიერლიგის 21-ე ტურში, საქართველოს ნაკრების ფეხბურთელმა 84-ე წუთზე საკუთარ საჯარიმოში
ხელით თამაშის გამო წითელი ბარათი მიიღო, მისი გუნდი კი პენალტით დაისაჯა, თუმცა მეტოქის თავდამსხმელმა მეკარე გილერმეს ვერ აჯობა, საბოლოოდ “რკინიგზელებმა” გროზნის “ახმატი” 1:0დაამარცხეს.
“ლოკომოტივს” 38 ქულა აქვს და მეოთხე ადგილზე იმყოფება.
