ლუკა მოდრიჩმა ხორვატიის საფეხბურთო ისტორიაში მორიგი ფურცელი ჩაწერა: მსოფლიო ჩემპიონატის შესარჩევ მატჩში, ხორვატმა ნახევარმცველმა სანაკრებო მაისური 135-ჯერ მოირგო და დარიო სრნას რეკორდი გააუმჯობესა (134).
კვიპროსის ეროვნული ნაკრების დამარცხების შემდეგ (1:0), მოდრიჩს ხორვატიის ეროვნული ნაკრების წევრებმა მხურვალე ოვაციები მოუწყვეს – ოქროს ბურთის მფლობელმა ფეხბურთელმა ემოციების შეკავება ვერ შეძლო.
იხილეთ ვიდეო
![ლუკა მოდრიჩი ხორვატიის ისტორიაში შევიდა | იხილეთ თანაგუნდელების ოვაციები 1 video](https://www.live.ge/wp-content/uploads/2021/03/https___s3-images.sportbible.com_s3_content_c62aec246060c4993f109e9de5daa1be.jpg)
ლუკა მოდრიჩის დებიუტი ეროვნულ ნაკრებში ზლატკო კრანჩარის ხელმძღვანელობის დროს, 2006 წლის 1 მარტს შედგა. მას შემდეგ ჩატარებულ 135 მატჩში, ხორვატმა 16 გოლის გატანა შეძლო. აღსანიშნავი ფაქტია, რომ მოდრიჩს 3 მსოფლიო ჩემპიონატსა და 3 ევროპის ჩემპიონატზე აქვს ნათამაშები.
სანაკრებო დონეზე, მის უდიდეს მიღწევას 2018 წლის მსოფლიო ჩემპიონატის ფინალში თამაში წარმოადგენს – ხორვატთა წარმატებაში, მოდრიჩმა ლომის წვლილი შეიტანა. იმავე წელს, ლუკა მსოფლიოს საუკეთესო ფეხბურთელად დასახელდა, რითაც მესი-რონალდუს 10-წლიანი ჰეგემონია დაასრულა.
35 წლის ასაკში, ლუკა მოდრიჩი “მადრიდის რეალის” ბირთვის შეუცვლელი წევრია: მიმდინარე სეზონში, მოდრიჩი “რეალის” მაისურით მოედანზე 36-ჯერ გამოვიდა (შეცვლაზე მხოლოდ 5-ჯერ ითამაშა). მისივე სიტყვებით, მიუხედავად იმისა, რომ უკვე 35 წლისაა, იგი თავს გაცილებით ახალგაზრდად გრძნობს და მეტი სიმაღლეების დაპყრობა სურს.
🥂 With a retrospective movie containing messages from seven Club 💯 members, a cake, and gifts, HNS and #Croatia internationals have celebrated @lukamodric10 record-breaking 1⃣3⃣5⃣th cap. It’s a privilege to have such a captain!#Family #LM135 pic.twitter.com/TspIQrUlkg
— HNS (@HNS_CFF) March 27, 2021