ევროლიგის მე-3 რაუნდის შეხვედრა თორნიკე შენგელიას “ცსკა”-მ “ზენიტის” წინააღმდეგ გამართა.
მატჩი არმიელების დომინირებით მიმდინარეობდა და საბოლოო შედეგიც ლოგიკური იყო, “ცსკა”-მ მეტოქეს 10-ქულიანი უპირატესობით, ანგარიშით – 77:67 სძლია.
შეხვედრის MVP თორნიკე შენგელია გახდა, რომელმაც ევროლიგის კარიერაში საუკეთესო შედეგი დააფიქსირა. ქართველმა ლეგიონერმა, პარკეტზე გატარებულ 35:48 წუთში, საკუთარ გუნდს 33 ქულა, 8 მოხსნა, 2 შედეგიანი გადაცემა და 2 ჩაჭრა მოუტანა.
შენგელია შედეგიანობით უპირობო ლიდერი იყო, როგორც საკუთარ, ისე მეტოქის კალათბურთელებს შორისაც, რამაც მისთვის ზედიზედ მეორე MVP-ის ტიტულის მინიჭება განაპირობა.
მატჩის შემდეგ შენგელიამ მხრის მიდამოში ტკივილი იგრძნო და ამჟამად ექიმების მეთვალყურეობის ქვეშაა, რაზეც რუსული კლუბი სოციალურ ქსელში განცხადებას აქვეყნებს:
Токо не сыграет с «Црвеной Звездой»
Сразу после матча с «Зенитом» Токо Шенгелия, самый ценный игрок Евролиги двух предыдущих туров, почувствовал боли в плече. Он проходит необходимые обследования в GMS Clinic и не сможет помочь команде в ближайших матчах pic.twitter.com/9qwCH8Q9KT
— CSKA Moscow (@cskabasket) October 14, 2021
“ზენიტთან გამართული მატჩის შემდეგ, ევროლიგის განვლილი ორი ტურის MVP თორნიკე შენგელიამ მხრის მიდამოში ტკივილი იგრძნო. შენგელია სამედიცინო შემოწმებას GMS-ის კლინიკაში გადის და მომდევნო შეხვედრაში გუნდს ვერ დაეხმარება”, – ვკითხულობთ “ცსკა”-ის ოფიციალურ Twitter-ის გვერდზე.
როგორც ცნობილია, თორნიკე შენგელიას ტრავმა განსაკუთრებულად მძიმე არაა, ის საკუთარ გუნდს რამდენიმე შეხვედრაში ვერ დაეხმარება.
შენგელიას გუნდი მომდევნო შეხვედრას კვლავ ევროლიგის ეგიდით, დღეს, 15 ოქტომბერს, თბილისის დროით 21:00 საათზე, “ცრვენა ზვეზდას” წინააღმდეგ გამართავს.