გრძელდება ჰამბურგის 500-ქულიანი ტურნირი, რომლის მოქმედი ჩემპიონის რანგში საქართველოს ყველა დროის საუკეთესო ჩოგბურთელი ნიკოლოზ ბასილაშვილი ასპარეზობს, შესაბამისად მას საკმაოდ დიდი ძალისხმევა მართებს, რომ გასულ წელს მოპოვებული 500-ქულა დაიცვას და საჩემპიონო თასი მეორედ აღმართოს.
ნიკა ამჟამად მსოფლიო რეიტინგში მე-16 პოზიციაზეა, მისი პირველი რაუნდის მეტოქე ბოლივიელი უგო დელიენი გახლდათ, რომელიც ქართველმა ჩოგბურთელმა საკმაოდ დამაჯერებლად, ორ სეტში დაამარცხა. რაც შეეხება ჩვენებურის მეორე რაუნდის მეტოქეს, ეს გახლდათ არგენტინელი, ხუან იგნასიო ლონდერო, რომელთანაც 3-სეტიანი დაპირისპირების შემდეგ, საკმაოდ მნიშვნელოვანი მომდევნო ეტაპის საგზური ნიკოლოზს დარჩა.
პირველი სეტის საწყის გეიმებში ნიკას თამაშს დამაჯერებლობა აკლდა, თუმცა მან ძალების მობილიზება მალევე მოახერხა და სეტებშიც დაწინაურდა – 6:4.
მეორე სეტში საწყისი გეიმები მეტოქეებმა გაინაწილეს, თუმცა გარდამტეხ მომენტში ლონდერომ ბრეიკის შესრულება მოახერხა, რითაც სეტებში წონასწორობა აღადგინა – 3:6.
გადამწყვეტ სეტში ქართველი ჩოგბურთელი ძალიან მოტივირებული და თავდაჯერებული გამოვიდა, მან უმალვე მოახერხა ბრეიკის გაკეთება და ეს უპირატესობა ბოლომდე შეინარჩუნა, შესაბამისად შეხვედრაც წარმატებით დაასრულა – 6:3.
შეხვედრის საბოლოო ანგარიში ასეთია: 6:4, 3:6, 6:3 – ბასილაშვილის სასარგებლოდ.
მომდევნო ეტაპზე ბასილაშვილის მეტოქე მსოფლიოს 77-ე ჩოგანი ჟერემი ჩარდი იქნება, რომელმაც ჰამბურგის ასპარეზზე თანამემამულე ფრანგები, ჯერ ბენუა პერი, შემდეგ კი რიშარ გასკე დაამარცხა.
Live.ge წარმატებებს უსურვებს ქართველ ჩოგბურთელს!
