სამხრეთ აფრიკაში 20-წლამდელთა შორის რაგბის მსოფლიო ჩემპიონატი დასრულდა. ჩემპიონი საფრანგეთის ნაკრები გახდა, რომელმაც ფინალში ირლანდიას 50:14 მოუგო.
ტურნირის დასრულების შემდეგ მსოფლიო რაგბის ვებგვერდმა ფინალური დღის ყველა მატჩი შეაჯამა და ყურადღება საქართველოსა და ახალი ზელანდიის შეხვედრასაც დაუთმო:
მატჩი მე-7 ადგილისთვის: საქართველო 26:50 ახალი ზელანდია
,,ახალი ზელანდია გადაურჩა საქართველოს ძლევამოსილ და მტკიცე საპასუხო დარტყმას (ჩვენი გუნდი 0:33-ს აგებდა, 65-ე წუთისთვის კი ანგარიში 26:33 იყო) და 20-წლამდელთა მსოფლიო ჩემპიონატზე მე-7 ადგილი დაიკავა. ,,ანდაზური” ორი ტაიმი გამოვიდა – პირველ ნახევარში ახალი ზელანდიის ტემპი გამოჩნდა, მეორეში კი სასაუბრო თემა საქართველოს სიძლიერე იყო.
საქართველოსთვის, რომელსაც 20-წლამდელთა მსოფლიო ჩემპიონატზე მისთვის საუკეთესო შედეგი უკვე გარანტირებული ჰქონდა, ახალ ზელანდიელთა ტემპზე გამკლავება ზედმეტად რთული გამოდგა. მთელი ტურნირის განმავლობაში ისინი დაცვაში კარგად გამოიყურებოდნენ, მაგრამ ზელანდიასთან პირველ 35 წუთში 38-დან 12 ბოჭვა გააფუჭეს. მეტოქემ ამით ბოლომდე ისარგებლა და ხუთი სწრაფი ლელოს დადება შეძლო.
თუმცა, ლადო კილასონიას ნაკრებს თამაში ადვილად არ დაუთმია და საქართველომ პირველი ტაიმის ბოლოს 2 ლელო დადო. მეორე ტაიმი კი ისე დაიწყო, როგორც პირველი დასრულდა – ქართველებმა თამაშზე კონტროლი მოიპოვეს. მაგრამ, მათთვის ახალ ზელანდიასთან პირველად მოგების იმედი მაშინ გაქრა, როცა ტაჰა კემარამ საჯარიმო მშვიდად შეასრულა და უპირატესობა 10 ქულამდე გაზარდა.
საქართველოს 20-წლამდელთა ნაკრებისთვის სამხრეთ აფრიკაში გამართული მსოფლიო ჩემპიონატი ისტორიული გამოდგა – უმცროსმა ,,ბორჯღალოსნებმა” ტურნირში მე-8 ადგილი დაიკავეს, რაც ჩვენი ნაკრებისთვის საუკეთესო შედეგია. ლადო კილასონიას გუნდმა ჯგუფურ ეტაპზე არგენტინისა (20:0) და იტალიის (30:17) დამარცხება შეძლო.
