საქართველოს ახალგაზრდული ნაკრების შემტევი, გიორგი კვერნაძე კარიერას ,,ფროზინონეში” გააგრძელებს. ინფორმაციას იტალიური გუნდის ოფიციალური ვებგვერდი ავრცელებს:
,,ფროზინონემ ფოთის ,,კოლხეთთან” გიორგი კვერნაძის ტრანსფერზე შეთანხმებას მიაღწია. 2003 წელს დაბადებული თავდამსხმელი იჯარით და გამოსყიდვის უფლებით ჩამოდის,” – წერია კლუბის განცხადებაში.
გიორგი კვერნაძეს საქართველოს 17, 19 და 21-წლამდე ნაკრებებში აქვს ნათამაშები. გასულ სეზონში 20 წლის ფეხბურთელი ,,დინამო ბათუმის” ღირსებას იცავდა და ეროვნულ ლიგაში ჩატარებულ 7 მატჩში ერთი ასისტი მიითვალა.
,,ფროზინონემ” 2022-2023 წლების სეზონში სერია B-ში პირველი ადგილი დაიკავა და მომავალი სეზონიდან სერია A-ში ითამაშებს.