ESPN-მა ჩემპიონთა ლიგის მიმდინარე სეზონის 11 აღმოჩენა დაასახელა და სიმბოლური გუნდი შეადგინა: ,,ჩემპიონთა ლიგა არის ტურნირი, რომელიც კარიერას განსაზღვრავს. ევროპის უდიდეს საკლუბო სცენაზე რამდენიმე კარგ თამაშს ფეხბურთელის რეპუტაციის ცვლილება, ახალი კონტრაქტის გაფორმება და მოწინააღმდეგე გუნდების სკაუტების მოზიდვა შეუძლია,” – წერს გამოცემა.
რჩეულთა შორის, რა თქმა უნდა, ,,ნაპოლის” ქართველი შემტევი, ხვიჩა კვარაცხელიაც მოხვდა, რომლის ანგარიშზეც ლიგის სადებიუტო სეზონში ჩატარებულ 5 შეხვედრაში 2 გოლი და 3 საგოლე გადაცემაა. კვარას გუნდმა ჯგუფური ეტაპი პირველ ადგილზე დაასრულა და გატანილი გოლების რაოდენობით იტალიურ კლუბებს შორის რეკორდიც დაამყარა:
,,ქართველი ფეხბურთელის სათამაშო ფორმა სერია A-ს ლიდერებისთვის მთავარი საუბრის თემა იყო და მისმა თამაშმა სარგებელი ჩემპიონთა ლიგაზეც მოიტანა. კვარაცხელიამ განსაკუთრებით ,,აიაქსი” დააზარალა (2 გოლი და 2 პასი ორ თამაშში), მას ,,რეინჯერსის” წინააღმდეგ რვა მცდელობა ჰქონდა, აღაფერი რომ არ ვთქვათ ,,ლივერპულთან” (4:1) შესანიშნავ თამაშზე. მოხერხებულობითა და არაპროგნოზირებადობით აღჭურვილი, მარჯვენა ფეხით მოთმაშე გარემარბი, ჩემპიონთა ლიგის სადებიუტო სეზონში მეტოქეებისთვის დიდ საშიშროებად იქცა.”
ESPN-ის ვერსიით, ლიგის მიმდინარე სეზონის აღმოჩენათა სიმბოლური თერთმეტეული ასე გამოიყურება:
მეკარე – დიოგო კოშტა (პორტუ)
მცველები – პედრო პორო (სპორტინგი), ანტონიო სილვა (ბენფიკა), სტრაჰინია პავლოვიჩი (ზალცბურგი), პიერო ინკაპიე (ლევერკუზენი)
ნახევარმცველები – ნიკოლას ზაივალდი (ზალცბურგი), ენცო ფერნანდესი (ბენფიკა), რაფაელ ონიედიკა (ბრიუგე)
თავდამსხმელები – ხვიჩა კვარაცხელია, ჯაკომო რასპადორი (ნაპოლი), მიხაილო მუდრიკი (შახტარი)
